ठाणे : शिरोळ (ता. शहापूर, जि. ठाणे) येथील शासकीय माध्यमिक व उच्च माध्यमिक आश्रमशाळेत अकरावीत शिकणाऱ्या प्रमोद पंढरी वीर या विद्यार्थ्याची कलाकृती राज्य पातळीवर विजयी ठरली आहे. महाराष्ट्र शासन, आदिवासी विकास विभाग यांच्या वतीने नऊ ऑगस्टला जागतिक आदिवासी दिनानिमित्त घेण्यात आलेल्या राज्यस्तरीय चित्रकला स्पर्धेत तो यशस्वी झाला आहे. त्यामुळे त्याला ‘आदिवासी रत्न’ हा पुरस्कार देऊन गौरविण्यात आले.
त्याच्या चित्राची दखल घेऊन नऊ ऑगस्टला नागपूर येथे आदिवासी विकास मंत्री डॉ. अशोक उईके, केंद्रीय मंत्री नितीन गडकरी, आदिवासी विभागा प्रधान सचिव मनीषा वर्मा यांच्या हस्ते त्याला गौरवण्यात आले. त्याबद्दल त्याचे सर्वत्र कौतुक होत आहे. शाळेचे प्रभारी मुख्याध्यापक डी. जे. पवार, कलाशिक्षक मारुती कांबळे आणि सर्व शिक्षकवृंदाचे मोलाचे मार्गदर्शन त्याला लाभले.
या अगोदरही प्रमोदने शालेय स्तरावर वारली चित्रकला स्पर्धेत यश मिळविले असून, शासकीय रेखाकला ग्रेड परीक्षेत पहिली ग्रेड मिळविली आहे. तालुका स्तरावर बालचित्रकला स्पर्धा, शाळा स्तरावर रांगोळी स्पर्धा अशा विविध स्पर्धांतही त्याने यश मिळविले आहे.